Ra ki Rangarajan2

ரா.கி. ரங்கராஜன்

 

     ''உடலசைவு மொழிகள்' (Body Language) என்ற சிறிய புத்தகத்தை (கண்ணதாசன் பதிப்பக வெளியீடு) அசரியா செல்வராஜ் என்ற அன்பர் எனக்கு அனுப்பியிருக்கிறார். என்னைத் தமது ஆசான் என்று குறிப்பிட்டுக் கடிதமும் எழுதியிருக்கிறார் (எப்போது, எப்படி இவருக்கு நான் ஆசான் ஆனேன் என்று ஞாபகமில்லை)

ஹிப்னாடிஸ மேதையான பேராசிரியர் ருஷிகுமார் பாண்டியாவின் சீடரான இவர், அவர் பெயரால் சுய முன்னேற்ற முறைகளைக் கற்பிக்கும் கழகமொன்றை நடத்திவருகிறார். அது குறித்துப் பல புத்தகங்களும் எழுதியுள்ளார்.

'உடலசைவு மொழிகள்' என்பது உரையாடல் இல்லாமலே, உடல் அசைவுகள் பாவங்கள் சேட்டைகள் மூலம் மற்றவரின் மனசைப் புரிந்துகொள்ளும் கலையாகும். நிறைய குட்டிக் கதைகளும் உதாரணங்களும் இந்தப் புத்தகத்தில் இருக்கின்றன. ஓரிடத்தில்--

'எப்படி மற்றவர்களது அங்க அசைவுகளை நீங்கள் கவனித்துக் கொண்டிருக்கிறீர்களோ, அப்படியே உங்கள் அங்க அசைவுகளையும் மற்றவர்கள் கவனித்துக் கொண்டிருக்கிறார்கள். உங்கள் உள்மனதில் கசப்புணர்ச்சி வெறுப்பு, அச்சம் போன்றவை இருக்குமேயானால் உங்களை அறியாமலே உங்கள் உடல் இந்த எதிர்மறை உணர்ச்சிகளை சமிக்ஞைகளாக வெளிப்படுத்தக்கூடும்... அச்சம், திகில், பீதி, கலக்கம் போன்ற உணர்வுகளால் ஒருவர் பாதிக்கப்படும்போது அது அவரது சருமத்தில் வெளிப்படுகிறது முகம் வெளிர்வது என்பது மிக முக்கியமான சமிக்ஞையாகக் கருதப்படுகிறது...' என்ற வரிகளைப் படித்தேன். இது மிகவும் உண்மை என்பதற்கு ஆதாரமாக ஒரு கதை ஞாபகம் வந்தது.

திகில் பட டைரக்ஷனில் கொடி கட்டிப் பறந்த ஆல்பிரட் ஹிட்ச்காக் திகில்தனமான கதைகள் எழுதுவதிலும் மன்னர். அத்துடன் பல எழுத்தாளர்களின் திகில் சிறுகதைகளைத் தேர்ந்தெடுத்து வெளியிட்டிருக்கிறார். அந்தத் தொகுப்புக்களிலிருந்து சுவையான சிய கதைகளை நான் மொழிபெயர்த்து தினமணி கதிர், சாவி குங்குமம் முதலான பத்திரிகைகளில் வெளியிட்டிருக்கிறேன் அவற்றிலே ஒன்று இது:

ஹாலிவுட்டில் ஒரு குட்டி நடிகன். ஓட்டலில் பணியாற்றும் அழகிய இளம்பெண் ஒருத்தியை மயக்கி மணம் செய்துகொள்கிறான். அவள் அவனிடம் விசுவாசமாக, காதலாக இருக்கிறாள். ஆனால் ஒரு பணக்கார நடிகை அவனிடம் காதல் கொண்டு படங்களில் சான்ஸ் வாங்கித் தருகிறாள். அவளை மணந்துகொண்டால் பெரிய ஹீரோவாக முன்னேறலாம் என்ற பேராசை அந்தக் குட்டி நடிகனுக்கு ஏற்படுகிறது. இளம் மனைவி ஒழிந்தால்தான் அது சாத்தியம்.

ஒருநாள் இரவு, மழையும் இருட்டுமான நேரத்தில் ஒரு சினிமா பார்த்துவிட்டுத் தியேட்டரிலிருந்து வெளிவரும் அவளை அவன் காரில் அழைத்துச் செல்கிறான். பிறகு அந்தப் பெண் காணாமலே போய்விடுகிறாள்.

குட்டி நடிகன் அவளைக் கொலை செய்துவிட்டான் என்று ஒரு துப்பறியும் நிபுணன் தீவிரமாக நம்புகிறான் அந்தப் பெண்ணைக் காதலித்து மணக்க ஆசைப்பட்டவன் அவன். குட்டி நடிகன் தான் கொலை செய்திருக்கிறான் என்று நிச்சயமாய்த் தெரிந்தபோதிலும் தகுந்த ஆதாரம் கிடைக்கவில்லை. கொலை செய்யப்பட்டவளின் உடலும் கண்டுபிடிக்கப்படவில்லை.

தன் தவிப்பை ஒரு சினேகிதரிடம் சொல்கிறான். அந்த சினேகிதர் மனோதத்துவம் தெரிந்தவர். மேஜிக் ஷோ நடத்துகிறவர். மாஸ்டர் என்று அவரை அழைப்பார்கள்.

துப்பறியும் நிபுணனிடம் அவர் 'நீ நேரே அந்த நடிகனிடம் போ. 'உன் மனைவி கொலை செய்யப்பட்டு ஓரிடத்தில்ஒளித்து வைக்கப்பட்டிருக்கிறாள். கொலையைக் கண்ணால்கண்ட சாட்சியும் இருக்கிறான் என்னுடன் வா,காட்டுகிறேன்' என்று சொல்லி இங்கே அழைத்து வா, மற்றதை நான் பார்த்துக்கொள்கிறேன்', என்கிறார்.

''அதெப்படி'.... என்று துப்பறியும் நிபுணன் சந்தேகம் கிளப்ப 'நான் சொன்னபடி செய்' என்கிறார் மாஸ்டர்.

அன்று இரவு குட்டி நடிகனை அழைத்து வருகிறான் அவன். மாஸ்டர் தன் சின்னக் காரில் அவனை ஏறிக்கொள்ளச் சொல்கிறார். துப்பறியும் நிபுணன் காரை ஓட்டுகிறான். நடிகனுக்கு மறுபுறம் மாஸ்டர் உட்கார்ந்து கொள்கிறார். அதாவது, ஓட்டுகிறவனுக்கும் மாஸ்டருக்கும் நடுவே நடிகன் நெருக்கினாற் போல் உட்கார நேரிடுகிறது. என் மனைவி கொலை செய்யப்படவில்லை.. சும்மா சொல்கிறீர்கள்' என்று அவன் முணுமுணுத்துக் கொண்டேயிருக்கிறான்.

மாஸ்டர் தன் சிநேகிதனிடம் நேரே இப்படிப் போ அங்கே திரும்பு இந்த வழி இல்லை, ஊகூம், அந்த வழி வலப் பக்கம் ஓட்டு ,மறுபடி இப்படி வா என்று இன்ஸ்ட்ரக்ஷன்கள் கொடுக்க, அதன்படியே அவன் வெவ்வேறு சாலைகள் வழியே ஓட்டுகிறான் குட்டி நடிகன் எரிச்சலுடன் 'எதற்காக இப்படிப் பைத்தியக்காரத்தனமாக எங்கேங்கோ ஓட்டுகிறீர்கள்?' என்று ஆட்சேபித்த வண்ணம் இருக்கிறான் மாஸ்டர் அவனை லட்சியம் செய்யவில்லை.

கடைசியில் ஒரு பாழடைந்து மூடப்பட்டுக் கிடக்கும் ஸ்டூடியோ வாசலில் காரை நிறுத்தச் சொல்கிறார். 'இங்கே... ஏன்... நான் வரமாட்டேன்' என்று குட்டி நடிகன் மறுக்கிறான் அவனைக் கையால் பிடித்து உள்ளே அழைத்துச் செல்கிறார் மாஸ்டர். பல இடங்களில் சுற்றுகிறார். கண்டா முண்டா சாமான்கள் போடப்பட்டுள்ள ஸ்டோர் ரூமை அடைகிறார்கள். அங்கே ஒரு பழைய சவப்பெட்டி இருக்கிறது. குட்டி நடிகன் ஓடப் பார்க்கிறான். அவனைப் பிடித்துக்கொள்கிறார் மாஸ்டர் சவப்பெட்டியைத் திறந்தால், அதற்குள் கொலை செய்யப்பட்ட பெண்ணின் உடல் கிடக்கிறது. குட்டி நடிகன் தன் கொலைக் குற்றத்தை ஒப்புக்கொள்கிறான்.

'எப்படி இதைக் கண்டுபிடித்தீர்கள்?' என்று துப்பறியும் நிபுணன் கேட்டதற்கு மாஸ்டர் சொன்ன பதில்.

'மேஜிக் மேதை ஹெளடினி தன் புத்தகத்தில் எழுதியிருக்கிற ஒரு தத்துவத்தின் அடிப்படையில் இதைச் செய்தேன். நம் இருவருக்கும் இடையில் அவன் நெருக்கி உட்கார்ந்திருந்தான் அல்லவா? நான் சொல்கிறபடியெல்லாம் நீ கண்டபடி ஓட்டினாய். சவத்தை ஒளித்துள்ள இடத்தின் திசையில் கார் போகும் போதெல்லாம் திகிலினால் அவன் உடம்பு இறுகியது. வேறு திசையில் செல்லும் போதெல்லாம் பயம் நீங்கி உடம்பு தளர்ந்தது. அந்த அதிர்வுகளையும் அசைவுகளையும் வைத்தே காரை ஓட்டச் சொன்னேன். ஸ்டூடியோவுக்குள் அவன் கையைப் பிடித்துக் கொண்ட போதும் அதை வைத்தே இடத்தைக்கண்டுபிடித்தேன். எந்தக் கொலையிலும் கண்ணால் கண்ட காட்சி ஒருவன் இருப்பான். கொலையைச் செய்தவன்தான் அந்தச் சாட்சி', என்று விளக்குகிறார் மாஸ்டர்.